ILOILO CITY – Nagakadapat nga magpaambitanay ang tanan ilabi na subong nga may yara sang Coronavirus Disease 2019 (COVID-19) kun sa diin madamu ang nadulaan sang palangabuhi-an.
Ini ang nangin sentro sang mensahe ni Msgr. Meliton Oso, director sang Jaro Archdiocesan Social Action Center, kadungan sang misa nga ginpatigayon sa Jaro Metropolitan Cathedral kaina sang aga.
Suno kay Msgr. Oso, madamo sa subong ang naga-antos ilabi na ang mga pigado nga wala sang permanente nga trabaho ukon ang mga daily wage earners.
Ginpahayag ni Msgr. Oso nga manggaranon man ukon imol, pareho lang nga naga-antos bangud sa ginapatuman nga Enhanced Community Quarantine apang lubos nga naapektuhan ang mga pigado.
Para naman sa mga may yara sang sobra, indi malain suno kay Msgr. Oso ang paghatag sang bisan gamay nga bulig sa mga nagakinahanglan.
Ang manggad suno sa natungdan ang materyal lamang nga butang kag indi madala sa pihak nga kinabuhi.
