ILOILO CITY – Liwat nga gin-athag sang Iloilo City Government nga ang pagpabakuna sa COVID-19 ang mangin boluntaryo sa mga pumuluyo.
Ini ang kasunod sang pagpangduha-duha sang publiko kag pagpamalibad nga magsuporta sa COVID-19 vaccination bangud sa kahadlok para sa ila nga ikaayong lawas.
Sa interview sang Bombo Radyo kay Iloilo City Councilor Alan Zaldivar, iya ginpahayag nga apisar ginalauman sang gobyerno nga mabakunahan ang tanan nga pumuluyo sang Iloilo City, nagakadapat nga respetuhon ang panindugan sang iban nga indi magpabakuna.
Suno kay Zaldivar, kun matigayon nga mag-abot na ang bakuna sa syudad sang Iloilo, plano man sang gobyerno nga magpatigayon sang serye sang mga endorsement may kaangtanan sa COVID-19 vaccine agud nga ma-edukar ang pumuluyo sa ka-epektibo sini.
Ginpahayag ni Zaldivar nga ang una nga phase sang vaccine nga baklon ang magacover sang 300,000 ka pumuluyo sa syudad sang Iloilo.
Gin-athag man sang natungdan, 18 anyos pataas ang target sang gobyerno nga mapabakunahan sang nasambit nga bakuna.
