ILOILO CITY – Kinahanglan sang Pilipinas nga pabaskugon pa ang relasyon sa Estados Unidos kag bag-o nga sabat kag panindugan sa tunga sang indi estable kag mainit nga geopolitics partikular na sa Asia Pacific.
Ini ang pahayag ni President Ferdinand “Bongbong” Marcos Jr. kadungan sang courtesy call ni United States Senator Tammy Duckworth sa Malacañang.
Sang nagpakigkita ang presidente sa iya counterpart nga si Joe Biden sang nagligad nga Mayo, ginpahayag ni Marcos nga kinahanglan nga pabakusgon ang partnership sa tunga sang duha ka mga pungsod sa post-pandemic economy kag sa tunga sang tension sa West Philippines Sea kag sa Asia-Pacific kag Indo-Pacific region.
Suno kay Marcos, magluwas sini, may iban pa nga mga issue nga nagahimo sa Pilipinas nga amo ang may pinaka-kumplikado nga geopolitical situation sa bilog nga kalibutan.
Sang Sabado, ilegal nga ginbombahan sang tubig sang Chinese Coast Guard ang Philippine Coast Guard vessels nga padulong sa Ayungin Shoal para sa resupply mission sa BRP Sierra Madre.
Ginkondenar sang Philippine Coast Guard ang Chinese Coast Guard bangud sa delikado kag ilegal nga paggamit sang water cannons batuk sa ila vessel.
Suno sa ahensya, ang ginhimo sang Chinese Coast Guard ang wala lamang nagtuga sang risgo sa mga crew sang Philippine Coast Guard kag supply boats, naglapas man ini sa international law lakip na ang 1982 United Nations Convention on the Law of the Sea, sa 1972 Convention on the International Regulations for Preventing Collisions at Sea kag sang 2016 Arbitral Award.
Ginpahayag sang Estados Unidos nga ang pagpang-atake sang China ang nagapamahog na sa regional stability. Ang Australia ang nagpahayag man sang pagkabalaka sa insidente nga gintawag sang Japan nga “unacceptable” ukon indi mabaton.
Suno sa Presidential Communications Office, ang pagsinapol sa tunga nanday Marcos kag Duckworth ang isa ka opurtunidad para sa Pilipinas nga i-raise ang importansya sang United States legislative support para sa common security kag trade interests, lakip na ang ginpabaskog nga bulig sa modernization sang defense and civilian law enforcement capabilities sang pungsod, ang gilayon nga reauthorization sang Generalized System of Preferences program, kag ang pagpatigayon sang iban nga strategic trade kag investment opportunities.
