ILOILO CITY– Ang pagbalik sang hollistic training kag development bilang kabahin sang military training ang isa sa mga basehan ni Iloilo 5th District Congressman Raul ‘Boboy’ Tupas sa pagduso sang reinstatement sang sections 38 kag 39 sang Armed Forces of the Philippines Reservist Act.
Sa interview sang Bombo Radyo kay Tupas, iya ginpahayag nga sa tion nga mahatagan sang atensyon ang military training pinaagi sa Reserve Officers Training Corps (ROTC) mas mapahangop kag mapabatyag sa mga pamatan-on ang espirito sang nasyonalismo, nation building kag preparedness.
Kun may dugang nga training ang mga pamatan-on suno kay Tupas mahatagan sang tion ang mga pamatan-on nga mangin preparado sa mga pagtilaw sang panahon, kahandaan sa kalamidad, lakip na ang paghibalo sang kasaysayan, mga baganihan kag mangin inspirasyon sa mga masunod pa nga henerasyon.
Indi lang ang paggamit sang armas ang mangin benepisyo sang liwat nga pagpanumbalik sang mandatory ROTC kundi ang mangin handa ang mga pamatan-on agud mangin first responders.
Sa tion nga makatapos na sa basic ROTC class mahimo na mag-apply sa lateral entry sang Armed Forces of the Philippines (AFP), Philippine National Police (PNP), Bureau of Jail Management and Penology (BJMP), kag Philippine Coast Guard (PCG).
Exempted naman sa mandatory ROTC ang mga physically and psychologically challenge, kag mga varsity players.
Nagalaum naman si Tupas nga ma-aprubahan ang counterpart part sa senado ang counterpart nga hagna.
