ILOILO CITY – Wala sang lamud pamulitika ang pagpahalin kay Mr. Ben Palma bilang pinuno sang Boarding House Commission.
Ini ang kasunod sang pagkumpirma ni Iloilo City Mayor Jerry Treñas nga iya na nga ginpahalin bilang pinuno sang Boarding House Commission si Palma kaupod sanday Mr. Iñigo Garingalao bilang pinuno sang Iloilo City Anti-Smoking Taskforce (ICAST) kag ni Engr. Roberto ‘Bobby’ Dumanil bilang pinuno sang Taskforce Anti-Squating and Illegal Structures (ASIS).
Sa interview sang Bombo Radyo kay Palma, iya ginpahayag nga malayo nga pamulitika ang motibo sa pagpahalin sa iya bilang pinuno sang Boarding House Commission bangud nga nahibalu-an na ni Treñas kun sa diin ang iya loyalty.
Sa pagkamatuod suno kay Palma, madugay na niya nga nahibalu-an nga pahalinon siya sa Boarding House Commission kag naka-istoryahanay na sila ni Treñas tuhoy diri.
Ginpahayag ni Palma nga mas nakapaayo nga nabuhinan ang iya trabaho bangud nga magluwas sa Boarding House Commission, siya man ang nagapamuno sa Task Force on Internet and Gaming Centers and Anti-Piracy (IGCAP).
Bilang pinuno sang Boarding House Commission, ginpahayag sang natungdan nga maayo man ang iya performance kag iya naman nga na turn-over sa masunod nga administrasyon ang mga dukomento nga makapamatuod sa iya pahayag.
Nahibalu-an nga si Mr. Teddy Tingson na ang nagbulos kay Palma bilang pinuno sang Boarding House Commission.
