ILOILO CITY – Amat-amat na nga ginatapos ang mga children’s playground nga ginpahamtang sa mga public plaza sa syudad sang Iloilo.
Sa interview sang Bombo Radyo kay Mayor Jose Espinosa III, iya ginpahayag nga gin-inagurahan na ang playground nga ginpahamtang sa Plaza Libertad sa City Proper samtang ginatapos pa ang mga playground nga ginpahamtang sa Jaro, Lapaz kag Molo Plaza.
Ginpahayag ni Mayor Espinosa nga katuyu-an sang nasambit nga proyekto amo nga mabalik ang kinaandan nga gawi sanga mga ulihing tubo nga maghampang sa public plaza sa baylo nga magpadulong sa mga mall.
Magluwas diri, ginpahayag man sang alkalde nga masadya man tulukon kun madamu nga kabataan ang nagahampang kag makapulos sa public plaza sa palibot sang syudad.
Samtang, ginkumpirma naman ni Engr. Bobby Divinagracia sang Iloilo City Engineer’s Office, nga ang mga materyales nga gingamit sa pagpahamtang sang playground ang ginbakal pa sa Malaysia.
Ang playground suno kay Divinagracia ang nagabili sang 1.9 million pesos sa diin nadugayan pa suno sa iya ang pagproseso sang dukomento bag-o natigayon ang proyekto.
