ILOILO CITY – Ginmandu na ni Mayor Jerry Treñas nga magpahamtang sang clustered clinics sa tagsa ka distrito sa syudad sang Iloilo.
Sa interview sang Bombo Radyo kay Public Safety and Transportation Management Office Head Jeck Conlu, iya ginpahayag nga ang tanan nga luyag nga magpa check-up ang mahimo nga magpadulong sa designated clustered clinics nga ipahamtang sa mga covered gyms kun sa diin may mga doktor kag medical technologists nga maga-duty.
Suno kay Conlu, wala sang dapat nga kahangaw-an bangud libre ang check-up kag ang pagpakuha sang swab sample para sa COVID-19 test depende sa assessment sang doktor.
Katuyu-an sang nasambit nga lihok suno kay Conlu amo nga malikawan ang pagdinaguso sa Diamond Jubilee Hall para sa swabbing.
Ginpahayag ni Conlu nga ang nasambit nga ideya ang isa sa mga ginsuhestyon ni Inter-Agency Task Force Deputy Implementer for Visayas Gen. Melquiades Feliciano.
