ILOILO CITY – Ginaduso sang Philippine Genome Center ang pagpahamtang sang dugang nga COVID-19 laboratory agud nga mapasangkad ang testing capacity sang pungsod.
Sa Good Morning Philippines program, ginpahayag ni Dr. Victor Marco Emmanuel Ferriols sang University of the Philippines Visayas kag Program Director sang Philippine Genome Center Visayas Satellite, nga madamo ang backlogs sa pagpaguwa sang COVID-19 test bangud nga gamay lamang ang laboratory sa pungsod.
Diri sa Visayas, ginpahayag ni Dr. Ferriols nga ang Teresita Lopez Jalandoni Provincial Hospital sa Negros Occidental amo ang nagapatigayon sang COVID-19 testing matapos nga naka-angkon sang mechanical problem ang Western Visayas Medical Center.
Suno kay Dr. Ferriols, mas madamo nga laboratory, mas maayo agud nga maproseso gilayon ang tanan nga specimen ilabi na nga madugay man ang pagproseso sini.
Ang Philippine Genome Center Visayas Satellite ang isa sa lamang sa pila ka satellite office sang nasambit nga COVID-19 testing center nga nabase sa Quezon City.
Ang nasambit man nga COVID-19 testing center ang nagahatag sang bulig sa mga hospital paagi sa pagpahulam sang equipment ukon pagpatigayon sang training sa pagpatigayon sang COVID-19 test.
