ILOILO – Magapaguwa pa sang Executive Order si Gov. Arthur Defensor Jr. may kaangtanan sa pagpahanugot sang bulang sa probinsya sang Iloilo.
Ini ang kasunod sang anunsyo ni Presidential Spokesperson Atty. Harry Roque nga mahimo na nga padayunon ang operasyon sang licensed cockpits lakip na diri ang pagpatigayon sang off-track horse race sa mga lugar nga yara sa Modified General Community Quarantine ukon may mas manubo pa nga quarantine classification.
Sa interview sang Bombo Radyo kay Defensor, iya ginpahayag nga nagkalain-lain na nga grupo ang nagpangayo sang bulig sa iya may kaangtanan sa nasambit nga isyu.
Suno kay Defensor, kun may yara sang mandu ang National Inter-Agency Task Force, iya ini nga pagasundon apang magapaguwa siya mismo sang guidelines may kaangtanan sa pagpatigayon sang bulang kag sang off-track horse race.
Kadalag-an naman para sa United Gamefowl Breeders Association of Panay ang nasambit nga development.
Sa interview sang Bombo Radyo kay Engr. Alex Bocol sang nasambit asosasyon, iya ginpahayag nga madamo na nga ahensya sang gobyerno ang ila nga ginpalapitan agud hingyuon nga pahanugutan ang pagpatigayon sang bulang.
Sa pagkamatuod suno kay Bocol, nag-umpisa ang ila kampanya apat ka bulan na ang nagligad.
Ang pagpanikasog sang United Gamefowl Breeders Association of Panay suno kay Bocol ang indi lamang para sa ila grupo kundi para sa tanan nga cockfighting enthusiast sa bug-os nga Pilipinas.
