Posible nga ipa-idalom na naman liwat sa lockdown ang Pilipinas sa tion nga may yara sang ma-detect nga panibag-o nga coronavirus strain nga makasulod kag maglapta sa pungsod halin sa United Kingdom.
Sa special meeting nga ginpatigayon ni Presidente Rodrigo Duterte kaupod ang Inter-Agency Task Force, ginpahayag sang presidente nga ang pagpaidalom liwat sa lockdown sang pungsod ang magadepende sa kun ano ka seryoso ukon ka-lala ang numero nga matapikan sang virus.
Mangin dako nga problema na suno kay Presidente Duterte kun magdamo ang kaso sang panibag-o nga strain.
Para naman kay Department of the Interior and Local Government Secretary Eduardo Año, indi pa kinahanglan nga ipa-idalom sa lockdown ang pungsod apang nagakadapat nga bantayan ukon siraduhon na ang international borders sang pungsod.
Sa subong suno kay Año, nagapabilin nga manageable ang sitwasyon sang COVID-19 sa Pilipinas.
Panugyan naman ni Secretary Carlito Galvez Jr., chief impementer sang COVID-19 response sang gobyerno, kinahanglan nga may yara sang “pro-active measures” ang gobyerno may kaangtanan sa new coronavirus strain nga una nga na-detect sa United Kingdom.
Lakip sa sini nga mga tikang amo nga dapat magpaguwa sang advisory ang Department of Foreign Affairs nga nagadumili anay sa mga overseas Filipinos sa UK nga magbalik sa Pilipinas.
Nagpanawagan man si Galvez sa Department of Transportation nga siguraduhon nga ang tanan nga mga pasahero sa eroplano nga nagasulod sa pungsod ang naga obserba sang mas hugot nga border control measures.
Isa pa ka suhestyon sang natungdan amo ang “active surveillance” kag “discreet investigation” sang mga militar kag pulis sa mga balikbayans nga nag-abot sa pungsod halin sa United Kingdom antes pa man nagguwa ang balita tuhoy sa panibag-o nga strain.
