ILOILO – Gin-athag ni Iloilo City Mayor Jerry Treñas nga luyag lang niya protektahan ang mga pumuluyo sa syudad sang Iloilo batok sa COVID-19 rason nga nadesisyunan nila nga ipaiway ang pagpatigayon sang Run for Jesus 2020.
Ini matapos nga nagpahayag sang pagkasubo kag pagkadismaya ang tagdumalahan sang Run for Jesus matapos nga ginpaiway ang ila nga kahiwatan.
Sa interview sang Bombo Radyo kay Mayor Treñas, iya ginpahayag bilang amay sang syudad kaupod man si Iloilo Governor Arthur Defensor Jr. katungdanan nila nga siguraduhon nga hilway ang syudad kag probinsya sang Iloilo sa nasamabit nga virus gani nadesisyunan nila nga ipaiway ang Run for Jesus 2020.
Suno kay Treñas, wala na sang iban nga rason kun ngaa ginpaiway ang kahiwatan.
Ginkumpirma man sang alkalde nga may yara na sang nag abot nga Korean nationals nagikan sa South Korea kag ila na ini ginpanugyanan nga boluntaryo nga magpaidalom sa quarantine.
