ILOILO CITY – Nabuhinan ang mga palas-anon sang mga motorista sa syudad sang Iloilo kasunod sang kumpirmasyon sang Malacañang nga nag-desisyon na si Presidente Rodrigo Duterte nga ipaiway anay ang implementasyon sang kontrobersyal nga child car seat law kag indi na mandatory ang private motor vehicle inspection system (MVIS).
Sa interview sang Bombo Radyo kay Iloilo City Councilor Atty. Rommel Duron, chaiman sang Committee on Transportation sa Sangguniang Panlunsod, iya ginpahayag nga good news ini ilabi na nga indi pa handa ang Land Transportation Office sa pagpatuman sang amo nga mga layi.
Magluwas nga ‘untimely’, may mga ‘unreasonable fees’ pa sa idalom sang bag-o nga car registraton system nga, suno kay Duron, indi man sarang mapaathag sang LTO sa publiko.
Kulang ang basehan, wala sang public consultation, kag madamo pa sang dapat ikonsiderar sa amo nga mga layi suno kay Duron.
Dayunon sa gihapon sang konsehal ang pagpasar sang resolution agud mapalab-ot sa LTO kag sa national government ang nakit-an sang iya komitiba nga dapat idugang sa amo nga mga layi.
Una na nagpanindugan si Duron nga mas maayo nga unahon anay ang pag-edukar sa mga drivers agud nga malikawan ang huros-huros nga pagpadalagan sang salakyan kag agud malikawan ang mga aksidente sa dalan.
