ILOILO CITY – Dapat anay tun-an ang pag-involve sa mga separatist kag Maoist groups sa pagpakig-away sa terorista nga grupo sa pungsod partikular sa Mindanao.
Ini ang panan-awan ni Sen. Francis Pangilinan sa plano ni Presidente Rodrigo Duterte nga mangin kabahin sang kampanya batok sa terorismo ang Moro National Liberation Front (MNLF), Moro Islamic Liberation Front (MILF) kag New People’s Army (NPA).
Sa interview sang Bombo Radyo Iloilo, ginpahayag sang senador nga makabulig ang information sharing sa tunga sang gobyerno kag nasambit nga mga grupo.
Apang kun mag-intra ang mga ini sa military operation, dapat anay nga tun-an ang lihok, bangud mahimo ini magtuga sang komplikasyon.
Nahibaluan nga nagtanyag pa sang bayad ang commander-in-chief sa mga miyembro sang amo nga grupo nga handa mag-upod sa gobyerno bangud kabisado sang mga ini ang terrain sa Mindanao.
Nakahanda man ang presidente nga magtukod sang bag-o nga army division para sa mga Muslim kag Maoist rebels nga maga-upod sa pagpakig-away batok sa Maute group.