Gin-athag ni Iloilo City Mayor Jerry Treñas nga apisar solid ang iya suporta sa presidential bid ni Vice President Leni Robredo, wala siya sang nakita nga problema sa pagpakigkita kag pag-amuma ni Vice Mayor Jeffrey Ganzon sa lain nga kandidato sang nagpadulong ini sa syudad.
Matandaan nga sang campaign sortie ni presidential candidate Ferdinand ‘Bongbong’ Marcos, Jr. sang nagligad nga semana sa isa ka hotel malapit sa Iloilo Convention Center, isa si Ganzon sa nagpakigkita kay Marcos.
Sa interview sang Bombo Radyo kay Treñas, iya ginpahayag nga naglisensya man ang bise-alkalde sa iya bangud nga malapit ang iya nga pamilya sa mga Marcos.
Pagkatapos sang bisita ni Marcos sa Iloilo City, nag-abot man sang Pebrero 25 si Robredo kag yara man si Ganzon sa amo rally suno sa alkalde.
Ginpahayag ni Treñas nga ‘diretso’ naman ini ni Ganzon.
Si Treñas kag Ganzon ang pareho nga nagapadalagan sa idalom sang banner sang National Unity Party kag sa idalom sang ila newly-established regional party nga Uswag Ilonggo Party.
Una diri, nag-isyu man si Ganzon sang official statement nga nagpahayag nga nangin ‘good host’ lamang siya kag patas sa pag-welcome sa tanan nga national candidates nga nagabisita sa Iloilo.
Ginpahayag ni Guanzon nga wala siya sang ginadala nga national party kag naga-stick siya sa iya nga matuod nga ‘color’.
