Normal lang nga pamalhason ka kun magtulog ka kun gab-i; apang ang indi normal amo ang pagbugtaw nga basa-basa na gid ang imo nga pajamas kag ang imo nga kutson bangud sang indi kinaandan nga pagpamalhas.
Suno kay Dr.Laura M. Rosch, isa ka osteopathic internal medicine specialist sa Wheaton, Illinois, ang pagpalamalhas kun gab-i ang mahimo maangot sa stress kag anxiety.
Pwede man ini maangot sa hormonal issues kaangay sang menopause, low testosterone, carcinoid syndrome kag hyperthyroidism.
Kun may yara ka sang hormonal issues, magluwas sa pagpalamalhas, makaangkon ka man sang indi mapaathag nga weight changes, pagbag-o bag-o sang energy level, kasakit sa ulo, sexual dysfunction kag menstrual changes.
Ukon posible man nga may ginainom ka nga bulong kag basi side effects niya ini.
Ang mas seryoso nga mga kondisyon nga mahimo maangot sa pagpalamalhas amo ang sleep apnea, cancer, kag neurological disorders.
San-o mo dapat bisitahon ang doktor?
Dapat ka nga magpakonsulta kun basa basa ka na gid kun magbugtaw, indi ka na makatulog, kag kun dala sini ang iban pa nga sintomas kaangay sang pagpalanakit sang lawas kag hilanat.
