ILOILO CITY – Wala na sang anuman nga legal obstacle sa ti-on nga magdesisyon si Presidente Rodrigo Duterte nga palawigon ang Martial Law sa Mindanao.
Ini ang ginpahayag ni Presidential Legal Counsel Salvador Panelo sa interview sang Bombo Radyo Iloilo, matapos ang pagpabor sang Korte Suprema sa Martial Law declaration.
Apang gin-athag ni Panelo nga wala pa sang desisyon ang commander-in-chief kun i-extend ang Martial Law bangud nakadepende ini sa sitwasyon sa Marawi.
Pero kun ang presidente lang ang pasugtan suno kay Panelo, gusto na sini matapos ang krisis sa Marawi kag ang Martial Law.
Suno kay Panelo, ginahulat pa ni Duterte ang rekomendasyon sang Armed Forces of the Philippines.
Pero kun kinahanglan nga palawigon ang Batas Militar, may duha ka opsyon ang Presidente.
Ginpahayag ni Panelo nga mahimo hambalan sang Presidente ang Kongreso kun gusto sini palawigon ang Martial Law kag ang Kongreso na ang ma-deliberate kag magdesisyon.
Kun magpaso ang 60 ka adlaw kag wala naabisuhan ang Kongreso, mahimo magpaguwa sang bag-o nga deklarasyon si Presidente Duterte kag wala sang legal question diri kun basehan ang desisyon sang Korte Suprema.