ILOILO CITY – Hulaton pa ang mangin resulta ukon numero sang subscribers nga nakaparehistro sang ila nga Subscriber Identity Module (SIM) card sa Abril 26, 2023 nantes makahimo sang desisyon kun bala, palawigon ang registration.
Sa interview sang Bombo Radyo kay Engr. Leah Doromal, director sang National Telecommunications Commission- Region VI, iya ginpahayag nga wala pa sang kasiguraduhan kun may extension nga matabo.
Suno sa iya, mas maayo nga makaparehistro na ang mga subscribers kag indi na paghulaton pa ang deadline sa Abril 26 bangud may posibilidad nga error ang link ukon application nga ginagamit bangud sa volume sang mga luyag nga mag parehistro.
Sa pagkamatuod, ang ahensya ang nagapatigayon sang simultaneous registration kun sa diin, sila mismo ang nagapadulong sa mga banwa ukon probinsya sa Western Visayas agud nga mas mapalapit sa tawo kag mapahapos ang registration.
Kahapon, sa banwa sang Dueñas, Iloilo sila nagpadulong.
Ang pagpatigayon sang face-to-face registration ang magalawig tubtob sa Abril 26.
Base sa data sang ahensya, as of April 11, may yara na sang masobra sa 66 million nga mga mobile subscribers ang nakarehistro nga naga-represent sang 39.41 percent sang 168 million ka mga mobile subscribers sa bilog nga pungsod.
