Ginpaiway sang isa ka kompaniya sang Japan nga handom nga mangin pinakauna nga pribado nga firm nga makapahamtang sang satellite sa orbit ang rocket launch sini sa ikatatlo na nga kahigayunan.
Gintalana kuntani sang Tokyo-based nga Space One ang ila ikatlo nga pagpalupad sang ila Kairos rocket halin sa launch pad sini sa Wakayama kaina, las-onse sang aga (oras sa Japan) matapos nga wala man nadayon ang pagpalupad sini kahapon nga adlaw.
Suno kay Bombo Josel Palma, international correspondent sa Japan, ang rason sang wala nadayon nga launching amo ang mabaskog nga hangin kag indi paborable nga tiempo.
Matandaan nga sang Marso, ang amo nga rocket ang naglift- off nga may dala nga government test satellite apang may na-detect nga technical problems rason nga ginpalupok ini.
Sa ikaduha nga launch attempt, ang rocket nagakarga kuntani sang lima ka satellites kalakip ang isa nga halin sa Taiwan Space Agency kag iban nga gindesinyo sang Japanese students kag corporate ventures.
Ang Space One gintukod sang 2018 sang major businesses kaangay sang Canon Electronics, IHI Aerospace, construction firm Shimizu, kag government-run Development Bank of Japan.
Natalana ang masunod nga launch attempt sa Mierkules.
