ILOILO – Nagsabat ang pamilya Somido may kaangtanan sa pagpalupok sang pusil sang isa ka police personnel kag imbestigador sa New Lucena Municipal Police Station.
Ang ginatumod nga pulis amo si Police Staff Sergeant Agar Octaviano, imbestigador sang New Lucena Municipal Police Station.
Matandaan nga sa panaysayon ni Octaviano, nagpadulong siya sa iya amay sa Barangay Bita-og Gaja, New Lucena, Iloilo sang Disyembre 10 kag sang manugpauli na siya, ginpahapit siya sa ila duta kun sa diin nagkit-anay sila sang grupo ni Andy Somido.
Ginapahayag nga may daan na nga hiligut-anon sa tunga nanday Octaviano kag Somido bangud man sa away sa duta.
Suno kay Octaviano, nagbaisay siya kag ang grupo ni Somido kag sang ulihi, ginsapote siya kag nalipong.
Sang naumpawan si Octaviano, gin-alegar niya nga buot siya nga damhagan sang indi masobra anom ka-tawo nga kaupdan ni Somido gani nagpalupok siya sang iya nga pusil bilang warning shot.
Samtang, ginpanginwala naman sang pamilya Somido nga nangamot sila kag nagsapote kay Octaviano.
Sa interview sang Bombo Radyo kay Ronel Somido, utod ni Andy Somido, iya ginpahayag nga nagabibit sang binangon kag pusil si Octaviano samtang nagasinggitan sang pangalan niya sa guwa sang ila nga tyangge.
Suno kay Somido nga nagpatunga man ang isa ka paryente ni Octaviano kag nagsiling nga siya nalang ang bahala kag indi pagpatulan ang pulis.
Nagsunod suno kay Somido ang utod niya nga si Andy sa likod sang paryente ni Octaviano apang nagwaras na ini sang iya binangon kag didto na natumba.
Sang matumba ini, gilayon nga nagpaguwa sang pusil nga ginatayaan ang tanan nga tawo kag nagpalupok sang makaduha ka beses.
Pahayag ni Somido nga wala man sila makapangamot sa pulis kag ang paryente lamang ni Octaviano ang nagatulod sa iya agud punggan.
Dugang pa sang natungdan, madamo man sang ginpangsumbag si Octaviano kag pila ka lupok ang ila nabatian sa talamnan sa diin ginpahayag nga balong kag yara ini sa impluwensya sang makahulubog nga ilimnon.
Nahibaluan nga magapasaka ang duha ka kampo sang kaso isa kag isa sa diin kaso nga Threat, Physical Injury, kag Trespassing batok kay Octaviano ang ipasaka sang pamilya Somido; samtang kaso nga Direct Assault batok sa kampo ni Somido ang ipasaka ni Octaviano.
