Dako ang posibilidad nga may yara naman sang matabo nga pagpang-atake sa Kabul airport.
Ini ang pagpaandam ni US President Joe Biden kasunod sang ginpahayag sa iya sang military commanders nga posible matabo ini subong nga Domingo nga adlaw.
Suno kay Marine Corps General Kenneth McKenzie Jr, commander sang US Central Command, padayon pa subong ang evacuations nga ginahimo sang Estados Unidos.
Matandaan nga 170 ka tawo ang patay matapos ginpalukpan sang suicide bomber ang airport samtang may mga Afghans nga nagatililipon agud mapasimpalad nga maakomodar sa evacuation flights.
Ang IS-K ukon Islamic State group sa Khorasan Province ang nag-ako sang pagpang-atake.
Bilang pagtimalos, nagpatigayon sang airstrike ang Estados Unidos sa eastern Afghanistan sa diin duha ka mga high-profile members sang IS-K ang napatay.
Suno kay Biden, indi pa ini ang katapusan bangud padayon nga lagson sang US ang sin-o man nga tawo nga involved sa pagpang-atake kag pat-od nga baydan sini ang mga kabuhi nga na-utas.
Apang ginpakamalaot man sang Taliban ang ginpatigayon nga airstrike sa diin pahayag niya, kuntani ginkonsulta anay sila sang US antes ginhimo ang amo nga tikang.
Duha na lang ka adlaw ang nabilin antes ang US withdrawal ukon ang deadline sang evacuation mission sang Estados Unidos.
Kag nagapati ang White House nga mas mangin delikado ang mga matabo sa masunod nga mga inadlaw.
