ILOILO CITY- Magapadayon ang Department of Social Welfare and Development (DSWD) Region 6 sa paghatag sang ayuda sa pihak sang ginapatuman nga election spending ban sang Commission on Elections (COMELEC).
Sa interview sang Bombo Radyo kay Mae Castillo, spokesperson sang DSWD Region 6, iya ginpahayag nga gin-grant sang COMELEC ang request for exemption sang DSWD sa sulod sang 45 ka adlaw nga period sang kampanya.
Suno kay Castillo, nagakahulugan ini nga indi mag-untat ang mga programa sang ahensya kaangay sang Pantawid Pamilyang Pilipino Program (4PS), Social Pension Program, Kapit-Bisig Laban sa Kahirapan-Comprehensive and Integrated Delivery of Social Services (Kalahi-CIDSS), kag iban pa nga financial assistance.
Nahibaluan nga ang election ban ang gindesinyo indi agud ma- paralyze ang operasyon sang gobyerno, sa baylo, agud ilikaw ang government procurement gikan sa political partisan activities nga sa masami ginapaagi sa bag-o nga mga proyekto nga gindesinyo agud impluwensiyahan ang publiko sa eleksyon.
