Ginpa-Bombo sang isa ka residente sa Barangay M.V. Hechanova, Jaro, Iloilo City ang ila kaingod-balay bangud sa pagpang-harass gamit ang 16mm nga kabilya paagi sa paglampos sini sa ila gate sang Disyembre 26, 2024.
Ini kasunod man sa ginapahayag kakulangan sang Jaro Police Station sa pagresponde sa natabo nga insidente.
Ang ginpa-Bombo nga kaingod-balay amo si Mervin Roscales.
Sa interview sang Bombo Radyo kay Engineer Brian Semeniego, residente sang nasambit nga lugar, iya ginpahayag nga Disyembre 25, nagrenta sila sang isa ka videokehan bangud kaadlawan sini, amo ang Disyembre 27.
Suno kay Semeniego, ginpatukar nila ang videokehan agud preparahan man ang palaabuton nga selebrasyon, apang sa amo man nga tion, nag-approach si Roscales kag nagpamangkot kon ano ang okasyon, ginsabat man sini nga birthday niya pagka-buwas nga adlaw.
Gin-athag man sini nga matawhay ang iya pagsabat sa lalaki apisar nga nagapangakig pa ini kag namuyayaw.
Ginpahog man sini ang katapo sang pamilya ni Semeniego paagi sa mga tinaga nga “patyon”.
Bangud sa ginhimo ni Roscales, naigo ang iloy ni Semeniego kag napilasan sa agtang.
Ginbuyagyag man sini nga ini na ang ika-duha ka beses nga natabo bangud kapareho man sini ang iya ginhimo sang Agosto, 2024.
Ginalantaw man ni Semeniego nga kahisa kag duta ang rason kon ngaa ginhimo ni Roscales ang amo nga akto.
Gilayon naman nga ginrespondehan sang barangay tanod ang insidente agud nga mapunggan ang pagpanghampak ni Roscales sang kabilya kag panghaboy sang flower pots.
Apang, ginkadismaya sa gihapon ni Semeniego ang nangin responde sang Jaro Police Station bangud wala gid sila sang may nahimo sa amo nga tion agud mahatagan sang leksyon si Roscales.
Ginakahadlok naman sang pamilya Semeniego ang posible dugang nga matabo kag mahimo sang lalaki batok sa ila pamilya.
