ILOILO – Indi solusyon ang pagpangakig para kay Iloilo Governor Arthur “Toto” Defensor Jr. agud solusyunan ang problema kaangay sang natabo sa coronavirus disease 2019 pandemic, African swine fever outbreak, kag mga bagyo.
Sa interview sang Bombo Radyo kay Governor Defensor, iya ginpahayag nga indi kinahanglan nga magpadala sa kaakig bangud mahimo solbaron ang problema pinaagi sa matawhay nga istoryahanay.
Suno kay Defensor, mahimo mag-demand sang accountability ang publiko pinaagi sa pag-gamit sang gahum sang demokrasya kaangay sang pagpabutyag sang pagkadismaya paagi sa media kag pagpatukod sang fact finding committee sa tion nga makitaan sang indi manami nga performance ang isa ka empleyado sang gobyerno.
Ginpahayag dugang sang natungdan nga nakit-an sini ang importansya sang maayo nga panguluhan pinaagi sa paghatag sang direktiba sang lider kaangay sa natabo nga lapnagon nga 3-day blackout sang nagligad nga bulan sa diin naistorya sini ang pinuno sang Department of Energy agud maghatag sang nagakaigo nga solusyon sa insidente.
