ILOILO CITY – Padayon ang pagpanghanda sang Department of Education may kaangtanan sa ipatuman nga online classes para sa school year 2020-2021.
Sa interview sang Bombo Radyo kay Dr. Leah Belleza, Education Program Supervisor kag tagpamaba sang Department of Education Region 6, iya ginpahayag nga apisar sa Agosto 24 pa ang pagbukas sang klase apang kinahanglan nga mangin handa ang tanan nga manunudlo.
Suno kay Belleza, ang mga manunudlo ang kinahanglan nga ipaidalom sa training may kaangtanan sa pagpatigayon sang online classes apang para naman sa mga naga-istar sa malayo nga lugar, may yara man sang alternatibo nga lihok nga ipatuman.
Ginpahayag ni Belleza nga kabahin sa mga alternatibo amo ang pagpakig-angot sa mga media organizations ilabi na sa community-based radios nga mangin palaagyan sang pagtudlo sa mga estudyante.
Magluwas diri, may yara man sang igapanghatag nga printed learning modules para sa mga estudyante nga wala sang ikasarang sa pagbakal sang computer ukon laptop kag internet connection.
