𝗜𝗟𝗢𝗜𝗟𝗢 𝗖𝗜𝗧𝗬 — Temporaryo nga ginpauntat ang pagpanagtag sang cash assistance sa mga benepisyaryo sang Department of Social Welfare and Development (DSWD) Region 6 sa isa ka mall sa Iloilo City.
Sa interview sang Bombo Radyo kay Atty. Carmelo Nochete, Director sang Department of Social Welfare and Development Region 6, iya ginpahayag nga natukiban sa amo nga kahiwatan ang mga peke nga benepisyaryo kag peke nga dokumento, kon sa diin, may nagakapalareho nga mga sakit apang isa lamang ka doctor ang nagpirma sa amo nga findings.
Suno kay Nochete, nakita man nga ginahakot ang mga benipesyaryo halin sa isa ka lugar nga tuman na ka obvious sa ila nga ahensya.
Ginpahayag man sini nga indi niya luyag nga magkadto sa mga peke kag may modus nga mga benepisyaryo ang kwarta sang gobyerno.
Gin-athag man sini nga temporaryo lamang ang pagpauntat sang pagpanghatag sang bulig sa mga nagakinahanglan.
Nagpasalig man ang natungdan nga magapadayon ang pagpanagtag sang assistance paagi sa guarantee letter kon sa diin, direkta nga bayaran sang ahensya ang ospital kon sa diin naka-confine ang himata sang isa ka benipesyaryo.
Nahibaluan nga indi magnubo sa P10,000 nga cash assistance ang mabaton sang mga benepisyaryo para sa burial kag medical assistance.
Tuyo naman sang ahensya mauntat ang mga kapareho nga modus agud nga magamit sa insakto kag nagakaigo nga butang ang kwarta nga bulig sang gobyerno.
