BUENAVISTA, GUIMARAS – Umpisahan na subong nga hapon, Hunyo 2, ang pagpanghatag sang form para sa Resident Identity Card sa Buenavista, Guimaras.
Sa interview sang Bombo Radyo kay Mayor Eugene Reyes, iya ginpahayag nga katuyu-an sang paghimo sang Resident Identity Card amo nga mapahapos ang contact tracing sa tion nga may yara na sang kumpirmado nga kaso sang Coronavirus Disease 2019 (COVID-19) sa banwa sang Buenavista.
Suno kay Reyes, ang matipon nga data gikan sa gin fill-upan nga form ang iga-encode sa computer system nga amo naman ang gamiton sa paghimo sang Resident Identity Card nga may yara sang barcode.
Ang nasambit nga ID ang pagagamiton sa pagsakay sa pump boat kag sa ulihi mahimo man ini nga gamiton sa pagsulod sa tagsa ka commercial establishment.
Gin-athag sang alkalde nga mangin libre ang pagpanghatag sang Resident Identity Card para sa mga tumandok sang banwa sang Buenavista.
