Pagsakit sang ulo, tuman nga pagka-uhaw, pagpanghina kag pagkalipong ang pila ka mga patimaan sang heat stroke.
Sa interview sang Bombo Radyo kay Dr. Elvin Tiangha, iya ginpahayag nga ang heat stroke amo ang ginakabig nga malala nga balatian sa diin tuman kataas ang temperatura sang lawas sang isa ka tawo.
Mataas ang posibilidad nga mag-angkon sang heat stroke ang isa ka tawo kun nagatinir ini sa tuman kainit nga lugar nga nagaresulta sa dehydration.
Suno kay Dr. Tiangha, kun nagadangat na sa 40°C ang hilanat sang isa ka tawo, nagadasig ang heart beat, nagakombulsyon, kag nagadiliryo, mahimo ini nga magresulta sa heat stroke.
Agud makalikaw sa heat stroke, nagakadapat nga:
- likawan ang pagtinir sa lugar nga may mainit nga temperatura,
- mag-inom sang madamo nga tubig,
- likawan ang pag-inom sang tsaa, kape, softdrinks kag makahulubog nga ilimnon
Ginpahayag ni Tiangha nga mas maayo nga mag-ehersisyo kun aga sa diin indi pa tuman ka init.
Panugyan sang doktor, dal-on gilayon sa ospital ang isa ka-tawo nga ginapatihan naheat stroke.
