Arevalo, Iloilo City- Ginkastigo sang duha ka mga barangay officials ang isa ka lalaki matapos nangawat sang duha ka hakop nga bugas sa Barangay Sto. Domingo, Arevalo, Iloilo City.
Ginapahayag nga may problema sa paminsaron ang nangawat nga lalaki.
Sa interview sang Bombo Radyo kay Police Chief Master Sergeant Mark Olano, imbestigador sang Arevalo Police Station, iya ginpahayag nga gilayon nagresponde ang mga pulis sa lugar, apang nadakop na ini sang mga opisyal.
Suno kay Olano, sang ginapangayuan na sang impormasyon ang lalaki nahanungod sa naagom nga mga lagob kag narekober nga bugas, diri na kag natukiban nga wala ini sa husto nga paminsaron, rason nga ginbuy-an nalang ini.
Ginpahayag sang natungdan nga indi magpasaka sang kaso ang barangay bangud sa kondisyon sini.
Sa subong, kaupod na sang lalaki ang iya pamilya.
Madamo naman ang nagpakamalaot sa mga opisyal bangud sa ila pagkastigo sa amo nga lalaki.
Samtang, nagpanindugan ang Punong Barangay sang Sto. Domingo, Arevalo, Iloilo City nga self-defense ang natabo rason nga ginkastigo sang duha ka mga barangay officials ang kawatan.
Sa interview sang Bombo Radyo kay Punong Barangay Carolyn Selorio, iya ginpahayag nga may yara sang binangon ang amo nga lalaki.
Suno kay Selorio, didto na kag ginkastigo sang duha ka barangay officials ang lalaki.
Ginpahayag sang natungdan nga kun nahibaluan lang nila nga may problema sa paminsaron ang lalaki, wala na nila ini ginsakit.
Ang duha ka opisyal nga ginpahayag nagsakit sa amo nga lalaki amo sanday Kagawad Carleone Gison kag si Romeo Selorio nga bana sang punong barangay.
