ILOILO CITY – Ginhatagan sang Iloilo City Government sang tubtob na gid lamang sa Marso 2 ang Chinese Businessman nga si Andrew Ong / Ong Ching Liung sa pagkuha sang gabyon nga iya gintambak sa Dungon Creek.
Sa interview sang Bombo Radyo kay Atty. Hernando Galvez, City Administrator, Marso 2 ang katapusan sang 30 days nga ginhatag sa iya sang komitiba sa pagkuha sang gintambak nga mga bato, balas kag mga gabyon sa sapa.
Nahibaluan nga sa pagsinapol nga ginpatawag kaina, wala nagsipot ang tiglawas sang City District Engineering Office sang Department of Public Works and Highways (DPWH).
Una na nga nagpabutyag sang pagkadismaya si Engr. Rodney Gustilo sang CDEO sa nangin lihok sang Chinese businessman nga indi pagkakas sang gintambak nga gabyon, nga direkta naman nga paglapas sang nakasugtan sang tinalikdan nga meeting.
Ang gintambak nga gabyon sang negosyante ang gintudlo rason sang mga pumuluyo sa indi kinaandan nga pagtaas sang lebel sang tubig sa kada mag-ulan-ulan nga nagahatag naman sa ila sang kakugmat kag huol sa pag-evacuate.