ILOILO CITY – Kumpirmado nga may paglapas sa quarantine protocol ang personnel sang Bureau of Fire Protection Region 6 nga nagpanglugayawan sa isla sang Boracay apisar nga wala pa natapos ang quarantine kag ulihi na lang nakumpirma nga positibo sa Coronavirus Disease 2019 (COVID-19).
Sa interview sang Bombo Radyo kay Police Major Francisco Paguia Jr., hepe sang Police Station 1, iya ginpahayag nga santo sa imbestigasyon, maathag nga may yara sang breach of protocol nga natabo bangud nga wala natapos ang 14-day quarantine sang nasambit nga personnel nga naghalin sa Cebu.
Suno kay Paguia, Hunyo 5 sang nag-abot sa syudad sang Iloilo ang nasambit personnel apang wala nalakip sa manifesto sang Locally Stranded Individual ang iya pangalan kag wala lang nahibalu-an kun ano ang salakyan nga gingamit halin sa Philippine Ports Authority terminal padulong sa Diamond Jubilee Hall.
Ginpahayag ni Paguia nga mahimo nga nalakip sa Authorized Person Outside Residence ang 26 anyos nga babayi kun sa diin sang Hunyo 6, ginkuhaan siya sang swab sample para sa COVID-19 test.
Sang Hunyo 9 suno kay Paguia, nag pull-out na sa ginatiniran nga hotel ang nasambit nga personnel kag sang Hunyo 12, natukiban nga yara sa isla sang Boracay ang 28 ka mga personnel sang Bureau of Fire Protection Region 6.
Sang Hunyo 12 man suno sa natungdan sang nakumpirma nga positibo sa COVID-19 ang nasambit nga personnel kag sang amo man nga adlaw sang sila ang nag pull-out sa isla sang Boracay.
Sa pangkabug-usan, maathag suno kay Paguia nga may yara sang paglapas sa quarantine protocol rason nga pasakaan gid sang nagakaigo nga kaso sang personnel nga nagpositibo sa COVID-19.
