Nagapati ang Oton Municipal Police Station nga planado ang pagluthang sang riding-in-tandem suspects sa head security officer sang Iloilo Fish Port Complex sa Barangay Buray, Oton, Iloilo.
Ang biktima amo si Erwin Jordan kag ginapahayag nga naka-drive pa padulong sa police station kag nakareport sa pulis angot sa insidente.
Matandaan nga si Jordan amo ang isa sa tatlo ka persons of interest nga gintumod sang Molo Police Station kaangot sa kamatayon sang health and sanitation officer sang fish port nga si Glen Peremne sang Abril 23 sa San Juan, Molo, Iloilo City.
Si Glen amo ang utod ni Jail Senior Supt. Gilbert Peremne, Assistant Regional Director for Administration sang Bureau of Jail Management and Penology Region 6 nga nagtaliwan bangud sa cardiac arrest matapos ang natabo nga pagpatay sa iya utod kag sa ulihi nagpositibo sa COVID-19.
Sa interview sang Bombo Radyo kay Police Captain Robert Jayson Pancha, hepe sang Oton Municipal Police Station, iya ginpahayag nga posible ginbalusan si Jordan sang natabo nga pagpatay kay Peremne.
Suno kay Pancha, naangot man si Jordan sa love triangle apang padayon pa ini nga gina-imbestigaran.
Nahibaluan nga sa Bakhaw, Mandurriao, Iloilo City nagapauli si Jordan apang sang adlaw nga natabo ang pagpangluthang, nagdul-ong ini sa Sta. Filomena Subdivision, Buray, Oton, Iloilo, sang iya co-worker.
Nagalaom man ang Oton Municipal Police Station nga mapadali ang pagrekober ni Jordan agud nga makahatag ini sang maathag nga pahayag may kaangtanan sa tuyo nga pagpatay sa iya.
