ILOILO CITY- Gintuad sang government whistleblower nga si Mr. Jeffrey Celiz ukon kilala sa tawag nga “Ka Eric Almendras” nga planado ang pagpangtapik sang mga posters nga nagapakamalaot sa New People’s Army sa nanuhay- tuhay nga bahin sang Pilipinas.
Sa interview sang Bombo Radyo kay Celis, iya ginpahayag nga ang nasambit nga tikang ang gin-inisyar sang Sentrong Alyansa ng Mamamayan para sa Bayan ukon SAMBAYANAN sa pila ka syudad kag probinsya kaangay sang Bicol, Masbate, Metro Manila, Cebu, Bohol, Negros, Iloilo kag iban nga bahin sang Mindanao.
Suno kay Celis, pamaagi ini sang grupo nga ipakita ang kaakig sang pumuluyo nga tapuson na ang terorismo nga ginahimo sang sang CPP-NPA-NDF.
Dugang pa niya, sa sulod sang masobra 50 anyos umpisa sang natukod ang NPA, masobra 50,000 na ang napatay bangud sa wala pulos nga ilinaway kag wala pulos nga pamaagi sang CPP-NPA-NDF.
Nahibaluan nga subong nga adlaw amo ang anibersaryo sang NPA.
