ILOILO CITY – Gindumili temporaryo sang Bureau of Fisheries and Aquatic Resources (BFAR) ang pagpanguha sang mga shellfish ukon pakinhason partikular sang scallops sa Isla Gigantes sa Carles, Iloilo.
Ini matapos magpositibo sa paralytic shellfish poison ukon red tide.
Sa interview sang Bombo Radyo Iloilo kay Remia Aparri, regional director sang BFAR Region 6, ginpahayag sini nga indi safe nga kan-on ang mga shellfish halin sa baybayon sang Isla Gigantes sa diin mahimo ini tunaan sang pagkahilo ukon kamatayon.
Gin-athag man sini nga ang mga isda, lokus, hipon kag kasag ang safe nga kan-on apang nagakadapat nga ini ang hugasan sang maayo antes lutuon.
Kaangot sini, nagpaguwa man sang Executive Order (EO) si Carles Mayor Salagunting Betita agud mapalab-ot sa mga nagapangisda sa nasambit nga isla ang pagpositibo sa red tide sang mga pakinhason.
Nahibaluan nga ang Isla Gigantes ang isa sa mga nagapanguna nga tourist attraction subong sa Panay Island sa diin magluwas sa manami nga mga talan-awon, ginakadtuan man ang manamit nga mga scallops sa nasambit nga isla.
Ginkilala man ang Isla Gigantes bilang isa sa “Most Beautiful Places in the World” sang Forbes Magazine.