ILOILO CITY- Ginadoble sang pagpanigarilyo ang mortality risk ukon posibilidad nga mapatay ang isa ka COVID-19 patient.
Sa interview sang Bombo Radyo kay Dr. Florentino Alerta, Iloilo Mission Hospital Medical Staff Training Consultant, iya ginpahayag nga magluwas nga isa ang pagpanigarilyo sa nagapanguna nga risk factor para sa balatian kag kamatayon nga naangot sa non-communicable diseases kaangay sang heart disease, hypertension, kag lung cancer, mahimo man ini nga magpataas sang risgo sang pagdevelop sang malala nga COVID-19.
Suno kay Dr. Alerta, sa tion nga maapektuhan sang pagpanigarilyo ang baga sang isa ka smoker, malawig ukon malip-ot man ang panahon nga nagapanigarilyo ini, mas mabudlay ang pagsulod sang hangin sa baga nga makapakomplikado sa pagginhawa sang tawo nga infected sang COVID-19.
Pahayag sang doktor, sa tion nga maglab-ot na sa phase 2 ang epekto sang COVID-19 kon sa diin ma-replicate na ang virus kag mag-apekto sa baga, mas mabudlayan ini nga magfunction.
Ini man ang rason kun kaisa nga apisar nag-ayo na sa COVID-19 ang pasyente, may post COVID-19 symptoms ini nga mabatyagan kaangay sang kabudlay sa pagginhawa.
