ILOILO CITY – Ginkakibot sang mga pumuluyo sang Barangay 11, San Miguel, Iloilo ang pagpaniro sang ila nga Sangguniang Kabataan (SK) Chairman nga amo man ang SK Federated President sang banwa.
Ang pagpaniro ang natabo sa Barangay San Jose sang amo nga banwa bangud gid lamang sa pagbina-isay sa social media may kaangtanan sa schedule sang basketball tournament.
Ang suspek amo si Mikhail Tadifa, 24, residente sang Barangay 11.
Samtang ang biktima amo si Dyezrelle Malaygay, 30, residente sang Barangay San Jose.
Sa interview sang Bombo Radyo kay Barangay 11 Kagawad Gerardo Sencil, Sr., iya ginpahayag nga natawo gid sa ila barangay si Tadifa kag agot sa duha ka mga mag-utod.
Magluwas nga isa ini ka opisyal, wala na sang trabaho si Tadifa.
Sa relasyon naman sa mga pumuluyo sang barangay, wala sang may nakita nga problema si Sencil kag maayo ang pagpakig-upod sa mga residente.
Apang kun basehan ang record, gintiro sini ang anay punong barangay sang Igtambo, San Miguel apang maswerte nga wala naigo.
Sa amo nga insidente, ginsaway gid lamang ni former punong barangay Pepe Sampilo si Tadifa nga magsunod sa protocol kaangay sang physical distancing kag pagsuksok sang face mask.
Nagbaisay sila nga duha tubtob nga nagpauli sa ila balay si Tadifa kag gintiro ang anay kapitan apang wala naigo.
Sa record man sang San Miguel Municipal Police Station, may yara sang kaso may kaangtanan sa illegal gambling si Tadifa.
Ini ang natabo sang 2019 sa isa ka namatyan sa ila man nga lugar kun sa diin, lakip ang SK Federated President sa mga nadakpan.
Apisar nakapyansa, nagapadayon pa ang hearing sa amo nga kaso.
Sa subong, wala sa gihapon nagsungka si Tadifa kag nagpanawagan man sang hustisya ang pamilya sang biktima.
