Suguran na sa Abril 8 ang pagpanukot sang P15 nga plete sa mga tricycle sa syudad sang Iloilo.
Ini ang kasunod man sang pag-apruba sang Iloilo City council sang Regulation Ordinance No. 2022-032 nga amo naga-impose sang fare increase sa tanan nga tricycle for-hire sa Iloilo City.
Sa interview sang Bombo Radyo kay Mario Selvederio, presidente sang Metro Iloilo City Federation of Tricycle Owners and Drivers Association, Inc. (MICFTODA), iya ginpahayag nga kuntani maintindihan man sang mga commuters ang pagsaka sa plete bangud sa padayon nga pagtaas sa presyo sang gatong kag iban pa nga nagapanguna nga mga balaklon.
Magasukot sang minimum fare nga P15 ang mga tricyle drivers sa una nga 2 ka kilometros kag P12 naman para sa mga senior citizens, estudyante kag persons with disabilities (PWDs).
Dugang naman nga P1 ang bayaran kun magsobra na sa 2 ka kilometros.
Kun akuparon ang tricycle, kinahanglan nga magbayad sang P50.
Kun duha ang sakay, kinahanglan nga magbayad P25 sa tagsa sa ila.
Kun indi magnubo sa tatlo ang pasahero, balik sa fixed increase nga P15 ang sukton sang mga drivers.
