Ginalantaw sang Department of Trade and Industry (DTI) nga ‘mataas ang tyansa’ nga aprubahan ang request nga pasakaan ang presyo sang masobra 30 ka basic necessities and prime commodities (BNPC) sa pungsod.
“Laban-laban maaprubahan na gid man ini. Ang ginalantaw na lang siguro sang DTI is pila ka porsyento ang i-allow sa ila nga ipasaka,” suno kay DTI Iloilo Provincial Director Judith Degala.
Apang indi pa ini pinal suno kay Degala. Ginatun-an pa ini subong sang Consumer Protection Group agud nga mabalanse man ang cost adjustments. Duha tubtub tatlo pa ka semana ang hulaton antes mapa-guwa ang pinal nga desisyon sang DTI.
Lakip sa 33 ka produkto nga yara sa price increase request list amo ang gatas, meatloaf, kag canned goods kaangay sang sardinas, apang posible nga madugangan pa suno sa direktor.
Ang gintumod rason sang mga manufacturers sa pag-hingyo sang price hike amo man ang epekto sang oil price hike dala sang Russia-Ukraine conflict, pagmahal sang raw materials, kag pagsaka sa presyo sang packaging materials.
Enero pa subong nga tuig sang ulihi nga nag-update ang DTI sa suggested retail prices (SRP) para sa nagapanguna nga kinahanglanon.
WALA SANG PRICE FREEZE
Wala sang nakit-an nga ground nga pwede ipatuman ang price control ukon pag-freeze sang presyo sang nagapanguna nga balaklon.
Ginpaathag ni Degala nga sa idalom sang Section 6 sang Republic Act 7581 ukon Price Act, i-freeze lamang ang presyo kun makit-an ini nga mga sirkumstansya:
* Kun ang lugar ang gindeklarar na nga disaster area ukon ginpaidalom sa state of calamity
* Kun ang lugar ginpaidalom sa emergency
* Kun suspendido ang privilege sang writ of habeas corpus sa lugar
* Kun ang lugar ginpaidalom sa martial law
* Kun ang lugar gindeklrarar nga napaidalom sa state of rebellion
* Kun ang lugar yara sa state of war Bangud wala man sang gin-implementar ang presidente nga state of emergency, wala sang sirkumstansya nga basehan suno sa DTI agud i-freeze ang mga presyo. ##
