Ginpasalig ni Finance Secretary Ralph Recto nga madamo na sila sang ginatun-an nga mas istrikto nga mga pagsulundan agud nga mas ma-regulate pa gid sang gobyerno ang online gambling.
Isa sa ginalantaw suno sa tiglikom amo ang pagpasaka sang buwis.
Ginakonsiderar man ang pagtugyan sini sa Philippine Amusement and Gaming Corporation (PAGCOR) nga amo ang makapasaka sang fees and charges nga ginakolekta sini sa online games.
Kun pasakaan ang buwis sang 10% suno sa opisyal base sa gross gaming revenue, makakolekta ang gobyerno sang dugang nga P20 billion kada tuig.
Lakip sa iban nga ginaproponer amo ang pagdumili sa mga opisyal sang gobyerno sa pagpasakop sa online gambling, pag-display sang mga paandam sa risgo sang gambling, kag paggamit sang national ID agud masiguro nga ang 21-anyos panubo nga mga indibidwal ang indi maka-access sa online gaming sites.
Nahibaluan nga nagakolekta ang PAGCOR sang 30% rate sa e-gaming platforms, samtang nagasukot naman ang Bureau of Internal Revenue sang dugang nga 5% franchise tax kag 3% auditing fee rason nga nagalab-ot ang total effective rate sa 38%.
