ILOILO CITY – Maga-agi sa regular filing ang pagpasaka sang kaso batok sa quarantine violators nga madakpan sa syudad sang Iloilo.
Ini ang kasunod sang paandam ni Iloilo City Mayor Jerry Treñas nga pagapresuhon ang mga madakpan nga nagaguwa sa balay apisar nga wala sang dala nga quarantine pass.
Sa interview sang Bombo Radyo kay Jeck Conlu, pinuno sang Public Safety and Transportation and Management Office, iya ginpahayag nga presuhon kag pagakasuhan gid ang violators apang bangud nga ginalikawan ang pagginutok sa jail facility, ang iban ang ginpa-blotter kag ginapapauli na lang.
Suno kay Conlu, ang City Proper ang may yara sang pinakamadamo nga quarantine violators sa bug-os nga syudad sang Iloilo.
Ginpahayag ni Conlu nga gina isa-isa gid ang mga salakyan agud usisaon kun bala may yara sang dala nga quarantine pass ang mga sakay kag kun ginasunod ang physical distancing.
Ang nasambit nga mga lihok suno sa natungdan ang pamaagi sang Iloilo City Government agud nga matapna ang paglapta sang Coronavirus Disease 2019 (COVID-19).
