ILOILO CITY – Gin-updan sang mga cause-oriented groups si Iloilo City Cuncilor Plaridel Nava sa pagpasaka sang kaso batok sa mga indibidwal nga naangot sa pagpatukod sang kontrobersyal nga P680-Million ang Ungka Flyover.
Kahapon sang hapon, pormal na nga ginpasakaan sang kaso sanday anay Department of Public Works and Highways Region VI Director Tiburcio Canlas; Department of Public Works and Highways Region VI Regional Director Nerie Bueno; Asst. Regional Director Jose Al Fruto kag Project Engineer Ormel Santos.
Kabahin sa mga ginpasakaan sang kaso ang mga personalidad sa bahin sang International Builders Corporation nga sanday Helen Edith Lee Tan kag Allen Son Tan, kag mga John Does nga may kahilabtanan sa pagkomiter sang violation nga sa subong, indi pa mapat-ud ang mga pangalan.
Magapangatubang sang mga kaso nga Gross Neglect of Duty, Grave Misconduct kag Conduct Prejudicial to the Best Interest of Public Service ang mga pangalan nga yara sa affidavit of complaint.
Sa interview sang Bombo Radyo kay Mr. Elmer Forro, Secretary General sang Bagong Alyansang Makabayan ukon BAYAN-PANAY, iya ginpahayag nga katuyu-an sang ila nga pag-upod kay Nava amo nga mapakita sa konsehal nga suportado sang nagkalain-lain nga grupo ang iya nga tikang.
Suno pa kay Forro, ginpa-untat pa kuntani sila sang pulis apang nagpaathag sila nga nagasuporta lamang sila kay Nava.
Pahayag pa niya, ang Ilonggos ACT Now! ang nagpadala man sang sulat sa Senado nga nagahingyo sang imbestigasyon sa Ungka flyover.
Dako man ang ila nga pagpasalamat bangud nga may yara na sang paghulag ang resolution sa House of Representative nga naga-request sang inquiry in aid of legislation.
Isa man sa nagpadala sang sulat sa Office of the Ombudsman amo si Msgr. Meliton Oso, director sang Jaro Archdiocesan Social Action Center.
Samtang, ginpahayag ni Forro nga magapadayon ang condemnation rally nga temporaryo nga gin-untat bangud sang malain nga panahon.
Ginalauman naman nga magadugang pa ang eskandalo bangud nga natukiban nga may yara sang problema sa Aganan flyover.
Suno kay Forro, dapat nga may manabat gid sa pag-uyang sang kwarta sang publiko.
