ILOILO CITY – Wala anay ginpadayon ni Iloilo City Councilor Plaridel Nava ang pagapasaka sang kaso batuk sa pila ka matag-as nga opisyal sang Department of Public Works and Highways Region VI kag International Builders Corporation.
Sa interview sang Bombo Radyo kay Nava, iya ginpahayag nga nakasugtan niya kag ni Mr. Elmer Foro, secretary general sang Bayan-Panay, nga sa Lunes na lamang ipasaka ang kaso bangud sang malain nga panahon.
Sa pagpasaka sang kaso, maga-upod man ang mga cause-oriented groups sa atubang sang Office of the Ombudsman.
Dugang pa ni Nava, madamo sila sang nadiskubrehan nga mga impormasyon nga gintago sa publiko nga amo ang rason sang vertical displacement.
Madamo pa suno sa iya sang mga cover-up nga natabo.
Sa subong, nakakita na sila sang isa ka civil engineer nga maka-collaborate sang ila nga findings.
Ini bangud nga ginalauman na nila nga madamo sang maga-kwestiyon sa ila sa tion nga mapasaka na ang kaso.
Ginpahayag man sang natungdan nga madamo sang nagatawag sa iya agud nga indi na pagdayunon ang pagpasaka sang kaso.
May yara man sang may naga-offer sang monetary support apang ginabalibaran niya.
