JANIUAY, ILOILO – Mahapos na para sa Janiuay Municipal Police Station nga magpasaka sang kaso batuk sa 42 anyos nga suspek sa paghimulos kag pagpatay sa dalaga sa Barangay Abangay, Janiuay Iloilo.
Ang biktima amo si Ronalyn Bravio, 19 anyos samtang ang suspek naman amo ang iya pakaduha nga si Rhegie Levoit, 42 anyos.
Sa interview sang Bombo Radyo kay Pol Capt Dadjie Delima, hepe sang Janiuay Municipal Police Station, iya ginpahayag nga mahimo bwas matigayon na ang affidavit sang 14 anyos nga lalaki nga amo ang anak sang suspek nga magatindog bilang testigo batuk kay Levoit.
Suno kay Delima, antes pa man mag-ako ang suspek, una na nga ginhambalan niya ini nga ipa-idalom sa DNA test kag gilayon na lamang nag-ako si Levoit nga siya ang naghimulos kag nagpatay kay Bravio.
Dugang pa sang natungdan, nag upod pa sa hot pursuit operation sa mga kapulisan ang suspek kag samtang nagasakay ini sa patrol car kaupod ang iya anak, na obserbahan sang mga kapulisan nga gina-akigan ni Levoit ang iya anak.
Diri kag nagduha-duha na ang mga pulis bangud daw kaangay nga ginatudluan sang suspek ang iya anak nga magbinutig.
Apang sang dalayon nga pagpamangkot sang mga kapulisan sa 14 anyos, iya man nga gintu-ad nga iya mismo man lang nga amay ang suspek sa pagpatay kag paghimulos kay Bravio.
