ILOILO CITY – Mas mangin mabaskog ang pagpasaka sang kaso nga adultery kun mapamatud-an nga may yara sang sexual intercourse ukon pagpakighilawas nga natabo sang tunga mga naga-luib.
Sa interview sang Bombo Radyo kay Atty. John Louis Mallare, isa ka Bombo Abogado, iya ginpahayag nga base sa Revised Penal Code, ang adultery ang mahimo nga mapasaka sang bana sa iya asawa sa tion nga mapamatud-an niya nga may yara sang pagpakighilawas nga natabo sa tunga sang asawa niya kag sang kerido.
Suno kay Atty. Mallare, ang mga elemento sang adultery amo nga dapat nga kasado ang babayi, ang babayi ang nagpakighilawas sa lalaki nga indi niya bana, kag ang lalaki nga iya kerido ang nakahibalo nga kasado ang babayi.
Mahimo man nga mabaton ang circumstantial evidence apang mas mabaskog kag sigurado ang kaso kun nadakpan sa akto ang asawa kag ang iya kerido nga nagapakighilawas kag may yara sang konkreto nga ebidensya nga makapamatuod nga nahimo ang mga elemento sang adultery.
Dugang pa ni Atty. Mallare, kun mapamatud-an nga guilty, sa isa ka count sang adultery, mahimo nga mapreso ang babayi sang duha ka tuig, apat ka bulan kag isa ka adlaw tubtob anum ka tuig.
Ang acquital sang isa sa akusado ang wala nagakahulugan nga ma-acquit man ang isa.
Suno kay Atty. Mallare, may yara sang nagakatabo kun sa diin, ginpanginwala sang kerido ang amo nga akusasyon.
Ang adultery ang makabig nga private crime, buot silingon, indi mahimo nga mangin complainant ang pulis ukon ang otoridad kundi, kinahanglan gid nga ang bana sang asawa ang mag-file.
