Iloilo City – Ginpaboran sang Public Safety Transportation and Management Office ang pag-abruba sa committee hearing nga mahimo pasakaan sang P5,000 ang multa sa mga salakyan nga naga-park sa bike lane sa syudad.
Kun balik-balikan, nagadangat sa P2,000 ang penalidad sa mga violators sa Iloilo City nga mas manubo kun ipaangid sa gin-aprubahan nga P5,000.
Sa interview sang bombo Radyo kay Mr Jeck Conlu, pinuno sang Public Safety Transportation and Management Office, iya ginpahayag nga tion na agud pasakaan ang penalidad agud madudla ang mga motorista nga wala nagasunod sa traffic rules and regulations.
Suno kay Conlu, ginapasiguro sang iya opisina nga nagabantay ini adlaw-adlaw agud tsikyaron kun nagasunod ang mga motorista sa ordinansa.
Nahibaluan nga ang ordinansa ang mangin palaagyan agud mangin disiplinado ang mga motorista sa syudad.
