ILOILO CITY — Nag-bug-os ang mga konsehal sang syudad sang Iloilo sa pagkumpirmar nga wala sang pagpahanugot sa Iloilo City Council nga pasiraduhan sang contractor sang water retention tank sa Jalandoni St. City Proper (kilid sang University of San Agustin) ang nahinambitan nga lugar.
Sa interview sang Bombo radyo kay City Councilor Joshua Alim, ginpahayag niya nga ginpamangkot gid niya ang Sanggunian Secretariat kung may request gid man halin sa Department of Public Works ang Highways (DPWH) agud pasiraduhan ang amo nga dalan apang wala sang record sa amo nga talatapan.
Ginpaathag ni Alim nga makabig iligal ang pagpasirado sang dalan kag pagpahamtang sang planta ukon temporaryo nga ulobrahan sang mga Box Culvert sa lugar tungod wala man ini gin abandonar sang gobyerno kag ilabi pa nga wala ini sang pahanugot nagikan sa City Council nga amo ang magapasar sang ordinansa sa pagpasirado sang dalan.
Ginpahayag naman sa Bombo Radyo ni City Councilor RLeone “Boots” Gerochi nga nadumduman niya ang angot sa proposal nga magpahamtang sang water retention tank sa amo nga dalan sang gin-reject sang City Council ang una nga proposal sang DPWH nga pang-utdon ang mga kahoy sakop sang Gen. Luna malapit sa area agud pahamtangan sang outlet sang drainage paggwa sa Iloilo River.
Nahisugtan ang pagpahamtang sang water retention tank sa lugar kag base sa nangin pagpahayag sang DPWH sa serye sang konsultasyon sang una, pahanugotan lamang nga saraduhon ang area kung magakutkot na kag igahulog ang mga pre-cast ukon human na nga mga box cuvert.
Samtang sa pagtsekyar sang Bombo radyo sa lugar, may mga 40 na ka human nga box culvert nga ginplastar sa lugar halin corner Gen. Luna- Jalandoni pakadto na malapit sa St. Therese Hospital samtang may pito pa ka box culvert nga gina-curing.