Ginaduso ni Senator Francis “Kiko” Pangilinan nga pataasan ang allowance sang mga manunudlo sa pungsod agud magamit sa internet kag sa produksyon sang learning modules.
Ini ang ginhingyo ni Pangilinan may kaangtanan sa selebrasyon sang “World Teachers’ Day” sa tunga sang COVID-19 pandemic. Nahibaluan nga sa Pilipinas, dungan ang pag-selebrar sang World Teachers’ Day sa pagbukas sang klase sa pampubliko nga eskwelahan bwas, Oktubre 5.
Sa subong, nagaplano ang senado nga pataasan ang P3,500 teaching supplies allowance sang public school teachers sa P5,000 agud makabulig sa pagbakal sang mga materyal para sa blended learning program.
Apisar sini, madamo ang nagapati nga indi bastante ang P1,500 nga increase sa allowance.
Suno kay Pangilinan, naga-chip in na ang mga maestra kag maestro agud makabakal sang mga printer kag makareproduce sang modules — butang nga mas mahal pa sa mga notebook kag school supplies sang mga estudyante nga sang una gina-amutan man nila.
Ginpahayag ni Pangilinan nga ang pagpataas sang allowance ang makabig kompensasyon sa serbisyo sang mga manunudlo nga nagapangabudlay subong nga may pandemya.
May kaangtanan sa pagbukas sang klase, nagpahayag si Pangilinan nga dapat siguraduhon sang gobyerno nga mapatuman ang istrikto nga mga protocol agud indi mabutang sa risgo ang health and safety sang mga manunudlo kag mga estudyante.
