ILOILO CITY- Ginapanan-aw sang sektor sang negosyo nga indi mangin makagalanyat sa mga investors, local man ukon foreign, ang ginalauman nga pagpataas sang minimum wage sa Western Visayas.
Sa interview sang Bombo Radyo kay Atty. Eunice Guadalope, Executive Director sang Iloilo Business Club, iya ginpahayag nga pat-ud nga isa ini sa makapadula sang gana sang mga negosyante nga mag-invest sa rehiyon bangud nga wala pa nakarekober ang ekonomiya.
Suno kay Atty. Guadalope, ginaulikdan man nila ang mga Micro, Small and Medium Enterprises (MSMEs) nga pat-ud nga pas-anon gid ang konsekwensiya sang mas mataas nga minimum wage.
Nahibaluan nga sa recommended minimum wage increase,ang mga empleyado sa private establishments nga may 10 ukon masobra pa nga mga tinawo ang magabaton sang Php450 daily wage gikan sa current Php395 wage per day, samtang ang mga industriya nga may empleyado nga10 ka bilog ukon mas manubo,ang minimum wage ang mangin Php 420 gikan sa current nga Php 310 per day.
Ang rekomendasyon ang yara na subong sa National Wages and Productivity Commission (NWPC) para sa review kag approval.
Sa subong suno sa natungdan, plano nila nga i-appeal ini nga recommendation sa NWPC.
