ILOILO CITY – Ginatun-an ni Iloilo City Councilor Jay Treñas ang pag-amyendar sang existing ordinance agud pataasan ang multa para sa tanan nga nagatuga sang obstruction sa bike lane.
Sa interview sang Bombo Radyo kay Treñas, iya ginpahayag nga katuyu-an sini amo nga mahatagan sang disiplina ang tanan nga motorista lakip na diri ang mga vendor nga nagabaligya sa bike lane nga para kun tani sa bike enthusiasts.
Suno kay Treñas, makatuga sang peligro para sa bikers ang ano man nga sahi sang obstruction kasubong sang naka-parking nga salakyan kag vendor nga nagapahamtang sang kiosko sa bike lane.
Ang university-loop bike lane nga nagalibot sa dalan Gen. Luna kag Delgado sa City Proper amo ang may madamo nga obstruction kun ipaanggid sa pinakamalaba nga bike lane sa Sen. Benigno Aquino Jr. Avenue sa Mandurriao.
Nahibalu-an nga si Treñas ang author sang “Iloilo University Loop Bike Lane Ordinance” kag “Iloilo Bicycle Parking Ordinance”.
