ILOILO CITY – Pabor ang commuters sa ginaduso nga pagpataas sang multa sa mga madakpan nga traffic violator sa Traffic Discipline Zone sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Leah Gange, iya ginpahayag nga mas makapaayo kun dugangan ang P50 nga multa agud nga matagam ang mga traffic violator sa Diversion Road.
Suno kay Gange, mas makapaayo nga mas mataas pa sa ginaduso nga P500 ang multa agud nga malikawan ang disgrasya tuga sang kakulang sang disiplina ilabi na sa pagtabok sa dalan.
Gin-ako ni Gange nga kun aga, malaka ang naga-agi nga salakyan kag wala pa sang may nagabantay nga traffic auxillary sa Traffic Discipline Zone, nagatabok na lang siya sa bisan diin lang sa baylo nga sa overpass.
Suno naman kay Arjay Avenido, call center agent, pabor siya sa ginaduso nga pagpasaka sang multa agud nga wala sang may maglapas sa traffic rules.
Ginpahayag ni Avenido nga importante nga sundon ang traffic signs bilang pagsunod sa ginaduso nga pagpa Leve-up sang syudad sang Iloilo kag agud nga makalikaw sa disgrasya.
