ILOILO – Labi pa nga nagadamo ang palamangkutanon may kaangtanan sa rason sang kamatayon sang police asset nga si Police Corporal Felfranz Lumahang sa Barangay Abilay Sur, Oton, Iloilo.
Matandaan nga santo sa spot report sang Iloilo Police Provincial Office, ginluthang-patay si Lumahang sang suspek nga naga-angkas sa motorsiklo 3:15 sang hapon sang Nobyembre 28 samtang ginaalegar nagahulat siya sa subject sa drug buy-bust operation.
Apang kun ibase sa rekord sang log book sa Iloilo Doctors Hospital kun sa diin gindala si Lumahang, 3:50 sa hapon nag-abot ang bangkay kag accidental firing ang ginapahayag nga rason sang mga nagdul-ong sa iya.
Santo sa impormasyon sang Bombo Radyo Iloilo, 6 ka mga lalaki nga ginapahayag back-up man ni Lumahang sa follow-up operation ang nagdala sang iya nga bangkay.
Duha ka salakyan ang nagdala kay Lumahang sa ospital kag siya ang ginkarga sa iya mismo nga awto.
Ginbalikan sang Bombo News Team ang radial road sa Barangay Abilay Sur, Oton kun sa diin ginapahayag ginluthang-patay si Lumahang sang suspek nga nagaangkas sa motorsiklo.
Sa interview sang Bombo Radyo kay Punong Barangay Antonio Masculino Jr., iya ginpahayahag nga 5:30 sang hapon, yara pa siya sa lugar kun sa diin natabo ang krimen.
Magluwas sa kapitan, may mga mga nagatrabaho man sa radial road nga una na nagpahayag nga 4:10 sa hapon ang ila nga urit.
Suno kay Masculino, sang yara siya sa lugar, wala gid sang may nakapanugid ukon nakamutik nga may naluthangan-patay sa lugar.
Wala man sang nabatian nga lupok kag wala man sang ginasuspetsahan nga salakyan sa amo nga lugar sa amo nga tion.
Sang temprano suno kay Masculino, may yara sang isa ka residente nga nagpahayag nga ginabanta 3:00 pm – 4:00 pm, may yara sang nagabaisay sa sulod sang salakyan apang wala lang natumod kun sanday sin-o kag kun ano ang rason.
Nagapati ang punong barangay nga kun sa ila lugar napatay si Lumahang, dapat nga lapaw na sa 5:00 sa hapon ukon 6:00 sa kasisidmon natabo ang krimen.
Samtang, sa interview naman sang Bombo Radyo kay Police Colonel Gilbert Gorero, officer-in-charge sang Iloilo Police Provincial Office (IPPO), iya ginpahayag nga may yara sang pagatukuron nga Special Investigation Task Group agud mapadalman ang kaso ni Lumahang.
Ginahulat na lang subong suno sa opisyal ang kumpirmasyon nagikan sa Police Regional Office VI.
Gin-athag ni Gorero nga isa ka legitimate drug buy bust operation ang gin-updan ni Lumahang.
Suno pa kay Gorero, wala man sang gag order nga ginpapanaug sa Oton Municipal Police Station.
Nahibaluan nga halin sang natabo ang krimen tubtob subong, wala pa sang statement nga ginpagwa ang hepe sang Oton Municipal Police Station apisar tuman kadamo ang palamangkutanon sang publiko sa rason sang kamatayon sang nasambit nga pulis.
